ဇူလိုင် ၃၁၊ The Nation Voice
စနေနေ့ညပိုင်းက ထိုင်းနိုင်ငံမြောက်ပိုင်းချင်းရိုင်ခရိုင်မှာရှိတဲ့ မယ့်ဖာလုံနိုင်ငံတကာလေဆိပ်မှာ ဆင်းသက်စဉ် မိုးကြီးနေလို့ Nok Air လေကြောင်းလိုင်းပိုင် ဘိုးအင်း (၇၃၇)လေယာဉ်လမ်းချော်ခဲ့ပေမဲ့ ဒဏ်ရာရသူတော့မရှိပါဘူး။
ဘန်ကောက်မြို့ရှိ ဒွန်မောင်းလေဆိပ်ကနေ ချင်းရိုင်ကိုဦးတည်ထွက်ခွာလာတဲ့ လေကြောင်းခရီးစဉ်အမှတ် DD108 မှာ ခရီးသည် (၁၆၄) ဦးနဲ့ အမှုထမ်း (၆)ဦးပါလာခဲ့ပါတယ်။
ဒွန်မောင်းကနေ ည ၈ နာရီကျော်မှာထွက်ခွာခဲ့ပြီး မယ့်ဖာလုံလေဆိပ်ကို ည ၉ နာရီကျော်မှာ ဆင်းသက်ခဲ့တယ်လို့ လေကြောင်းလိုင်းက စနေနေ့ညမှာထုတ်ပြန်ပါတယ်။
ဆင်းသက်စဉ် မိုးရေကြောင့်လမ်းချော်ခဲ့ပေမဲ့ လေယာဉ်မှူးက ဘေးကင်းကင်းဆင်းသက်ပြီးရပ်နိုင်အောင် စီမံနိုင်ခဲ့တယ်လို့လည်း အသိပေးပါတယ်။
ခရီးသည်နဲ့အမှုထမ်းအားလုံးကို နားနေဆောင်ထဲ ဘေးကင်းကင်းနဲ့ပြောင်းရွှေ့ပေးထားပြီး ဒဏ်ရာရသူ မရှိဘူးလို့လည်း အသိပေးပါတယ်။ ဘာကြောင့် အခုဖြစ်ရပ်ဖြစ်ရသလဲဆိုတာကို စုံစမ်းစစ်ဆေးနေတယ်လို့လည်း အသိပေးပါတယ်။
ချင်းရိုင်ကိုပြေးဆွဲနေတဲ့ခရီးစဉ်အားလုံးကို ဖျက်သိမ်းထားတယ်လို့လည်း လေကြောင်းလိုင်းက အသိပေးပါတယ်။ အခုဖြစ်ရပ်ကြောင့် လေဆိပ်ပြေးလမ်းကို တနင်္ဂနွေနေ့ မနက် ၆ နာရီကနေ ည ၁၀ နာရီအထိပိတ်ထားမယ်လို့ မယ့်ဖာလုံလေဆိပ်က ထုတ်ပြန်ပါတယ်။
