ဩဂုတ် ၁၇၊ The Nation Voice
မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)က စစ်ကောင်စီတပ်တွေကို ဩဂုတ် ၁၅ရက်နဲ့ ၁၆ရက်က တိုက်ခိုက်ခဲ့ရာ စစ်ကောင်စီတပ်က (၈)ဦးသေဆုံးပြီး ဒဏ်ရာရသူတွေရှိတယ်လို့ မြိုင်ပကဖက တိုက်ခိုက်မှု သတင်းနောက်ဆက်တွဲအခြေအနေကို ဖော်ပြခဲ့ပါတယ်။
မြိုင်မြို့နယ်၊တဲကြီးရွာနဲ့နယ်သတ်ရွာကြားမှာ စစ်ကောင်စီကား(၂)စီးကို ဩဂုတ် ၁၅ရက်က တိုက်ခိုက်ခဲ့ပြီး အဲဒီနေ့၊အဲဒီနေရာမှာပဲ စစ်ကောင်စီကင်းပုန်းတွေကိုတိုက်ခိုက်ခဲ့တာဖြစ်ပါတယ်။ကား (၂)စီးတိုက်ခိုက်မှုမှာစစ်ကောင်စီတပ်က (၁)ဦးသေ၊ (၃)ဦး ဒဏ်ရာရခဲ့တယ်လို့ဆိုပါတယ်။အဲဒီတိုက်ခိုက်မှုအပြီးမှာ ကြောက်လန့်ထွက်ပြေးတဲ့ စစ်ကောင်စီ ကင်းပုန်းတပ်ဖွဲ့ဝင် (၄)ဦးဟာလည်း မိုင်းနဲ့တိုက်ခိုက်ခံရလို့ (၃)ဦးသေ(၁)ဦးဒဏ်ရာရခဲ့တယ်လို့ ရုပ်သံမှတ်တမ်းတွေနဲ့အတူ ထုတ်ပြန်အသိပေးထားပါတယ်။
ဩဂုတ် ၁၆ရက်မှာ ထပ်မံကင်းပုန်းလာဝပ်တဲ့ စစ်ကောင်စီတပ်ဖွဲ့ဝင်တွေကို တဲကြီးရွာနဲ့နယ်သတ်ရွာကြားမှာပဲ မိုင်းနဲ့ တိုက်ခိုက်ခဲ့လို့ စစ်ကောင်စီတပ်သား (၃)ဦးသေဆုံးပြီး (၂)ဦး ဒဏ်ရာရခဲ့တယ်လို့ ထုတ်ပြန်ပါတယ်။
အဲဒီ တိုက်ခိုက်ခဲ့တဲ့နေရာတွေကို သွားရောက်စစ်ဆေးတဲ့အခါမှာ ခဲယမ်း၊ကျည်တွေနဲ့စစ်အသုံးအဆောင်ပစ္စည်းတွေရခဲ့တာလို့ မြိုင်ပကဖက အသိပေးခဲ့တဲ့အပြင် အဲဒီနေရာကနေ စစ်ကောင်စီတပ်ဖွဲ့ဝင် အလောင်း (၈)လောင်းနဲ့ ဒဏ်ရာရသူ (၂) ဦးကို Faw ကားနဲ့သယ်သွားတယ်လို့ သိရကြောင်း အသိပေးထုတ်ပြန်ခဲ့ပါတယ်။
