ဩဂုတ် ၂၆၊ The Nation Voice
တာဝန်ကနေနှုတ်ထွက်ဖို့ တောင်းဆိုမှုတွေရှိနေပေမဲ့ ကာကွယ်ရေးဝန်ကြီးအဖြစ် ဆက်ပြီးတာဝန်ထမ်းဆောင်မယ်လို့ ပရာယွတ် ချန်အိုချာက ကြာသပတေးနေ့မှာပြောပါတယ်။ ဗိုလ်ချုပ်ကြီး ပရာယွတ် ကြာသပတေးနေ့မှာ ရုံးမတက်ခဲ့ဘူးလို့ ကာကွယ်ရေးဝန်ကြီးဌာနသတင်းရင်းမြစ်တွေဆီကနေ သိရကြောင်း ဘန်ကောက်ပို့စ်သတင်းစာကဖော်ပြပါတယ်။
ဒါပေမဲ့ အွန်လိုင်းကနေ ကာကွယ်ရေးကောင်စီအစည်းအဝေးပြုလုပ်ခဲ့ပါတယ်။ အစည်းအဝေးကို ကာကွယ်ရေးဝန်ကြီးဌာနအမြဲတမ်းအတွင်းဝန်၊ ကြည်း၊ ရေ၊ လေ တပ်ချုပ်တွေနဲ့ အဆင့်မြင့်စစ်တပ်အရာရှိကြီးတွေတက်ရောက်ခဲ့ပါတယ်။အစည်းအဝေးပြုလုပ်တာဟာ သူ့ကို ရာထူးကနေနုတ်ထွက်ဖို့ ဖိအားပေးနေတာတွေကို လျော့ပါးအောင်ပြုလုပ်တာလို့ ရှုမြင်နေကြပါတယ်။
သူ့ကိုစိတ်မပူဖို့နဲ့ ကာကွယ်ရေးဝန်ကြီးအဖြစ် ဆက်လက်တာဝန်ထမ်းဆောင်နေမယ်လို့ ပရာယွတ်က အစည်းအဝေးတက်ရောက်သူတွေကိုပြောတယ်လို့ ကာကွယ်ရေးဝန်ကြီးဌာနပြောခွင့်ရသူ ကောင်ချိ တန်တရာဝါနစ်ခ်ျက ပြောပါတယ်။ စာရွက်စာတမ်းတွေလက်မှတ်ထိုးဖို့အတွက် အိမ်မှာသာ အလုပ်လုပ်လိုပြီး အရေးကြီးတဲ့ညှိနှိုင်းမှုတွေအတွက် ရုံးတက်မယ်လို့ ပရာယွတ်ရဲ့အကြံပေးအဖွဲ့ကပြောပါတယ်။ ဗုဒ္ဓဟူးနေ့မှာ ပရာယွတ်ကို ဝန်ကြီးချုပ်အဖြစ်ကနေ ရပ်စဲကြောင်း ထိုင်းဖွဲ့စည်းပုံအခြေခံဥပဒေတရားရုံးက အမိန့်ချလိုက်ပါတယ်။
ထိုင်းဥပဒေအရ ဝန်ကြီးချုပ်ဟာ သက်တမ်းနှစ်ဆက် ၈ နှစ်သာ တာဝန်ထမ်းဆောင်နိုင်ပြီး ပရာယွတ်ဟာ အာဏာသိမ်းခဲ့တဲ့ ၂၀၁၄ ခုနဏ္ဍစ်၊ ဩဂုတ်ကစပြီး ဝန်ကြီးချုပ်တာဝန်ယူထားတာပါ။ လက်ရှိမှာ ဒုတိယဝန်ကြီးချုပ် ပြည်ထဲရေးဝန်ကြီး ပရာဝတ် ဝမ်ဆူဝမ်က ယာယီဝန်ကြီးချုပ်အဖြစ် တာဝန်ထမ်းဆောင်နေပါတယ်။ မြေပိုင်ဆိုင်မှုအရှုပ်အထွေးရှိတဲ့မြေကွက်တကွက်ကို လက်ခံထားလို့ ပညာရေးဒုတိယဝန်ကြီးကိုလည်း ထိုင်းတရားရုံးချုပ်က သောကြာနေ့မှာ ရာထူးက ရပ်ဆိုင်းခဲ့ပါတယ်။
