စက်တင်ဘာ ၇၊ The Nation Voice
စစ်ကိုင်းတိုင်း၊ပုလဲမြို့နယ်ကနေ ကံကြီးကျေးရွာဘက်ကို ထွက်ခွာလာတဲ့ စကစ စစ်ကြောင်းကို နှစ်ဆင့်ကွဲ ရှေ့ထွက်မိုင်းတွေနဲ့စက်တင်ဘာ(၆)ရက်နေ့က မိုင်းဆွဲတိုက်ခိုက်ခဲ့တယ်လို့ ကျားသစ်နက်ပြောက်ကျားတပ်ဖွဲ့က ထုတ်ပြန်ပါတယ်။
ပုလဲမြို့နယ်ကနေထွက်ခွာလာတဲ့ အင်အား(၁၃၅)ဦးခန့်ပါ စကစစစ်ကြောင်းဟာ စစ်ကြောင်း(၃)ကြောင်း ခွဲပြီး ဖြန့်ထွက်လာကြစဉ် ကံကြီးကျေးရွာနား အရောက်မှာ ဒေသခံပူးပေါင်းတပ်တွေက အသင့်စောင့်ဆိုင်း ပြင်ဆင်ထားတဲ့ အင်အားပြင်းနှစ်ဆင့်ကွဲရှေ့ထွက်မိုင်းတွေနဲ့မိုင်းဆွဲတိုက်ခိုက်ခဲ့တာလို့ သိရပါတယ်။
မိုင်းဆွဲတိုက်ခိုက်မှုကြောင့် အထိနာသွားတဲ့ စကစတပ်တွေဟာ အနီးနားကျေးရွာက ပြည်သူ့ပိုင်နေအိမ်တွေထဲသို့ ဝင်ရောက်ပြီး ဒဏ်ရာရနေတဲ့စကစတပ်သားတွေကို ပုဆိုး၊တဘက်တို့နဲ့ ဒဏ်ရာတွေကို စည်းနှောင်ပြီး ထမ်းပိုးသွားကြောင်း နယ်မြေခံတွေပြောပြချက်အရ သိရတယ်လို့ ဆိုပါတယ်။
နယ်မြေရှင်းလင်းရေးလုပ်တဲ့အခါမှာသွေးအိုင် တော်တော်များများတွေ့ရှိခဲ့တာကြောင့် ဒဏ်ရာရရှိတာကို အထည်ပြုနိုင်ခဲ့တယ်လို့ ကျားသစ်နက်ပြောက်ကျားတပ်ဖွဲ့က ထုတ်ပြန်ထားပါတယ်။
အဲ့ဒီတိုက်ခိုက်မှုကိုတော့ ကျားသစ်နက်ပြောက်ကျားတပ်ဖွဲ့နဲ့အတူ ယင်းမာပင်ခရိုင်တပ်ရင်း (၁၁)၊ပုလဲတပ်ရင်း (၅)တို့က အတူပူးပေါင်းလုပ်ဆောင်ခဲ့တယ်လို့ သိရပါတယ်။
