စက်တင်ဘာ ၁၀၊ The Nation Voice
မကွေးတိုင်း၊ ထီးလင်းမြို့နယ်အတွင်းရှိ အများပြည်သူလုံခြုံရေးအတွက် စစ်ဆေးရေးဂိတ် (၄)ခုဖွင့်ပြီး လုံခြုံရေးဆောင် ရွက်ပေးနေပြီဖြစ်တယ်လို့ YDF(ထီးလင်း)က ဒီကနေ့ စက်တင်ဘာ (၁၀) ရက်မှာ အသိပေးထုတ်ပြန်လိုက်ပါတယ်။ အဲဒီစစ်ဆေးရေးဂိတ်တွေမှာ မည်သည့် အခကြေးငွေမျှ တောင်းယူကောက်ခံမှာမဟုတ်ဘဲ အများပြည်သူတို့ရဲ့လုံခြုံရေးကိုသာ ဆောင်ရွက်သွားမှာဖြစ်တယ်လို့ ဆိုပါတယ်။
” အများပြည်သူ လုံခြုံစွာ သွားလာနေထိုင်နိုင်ရန် ရည်ရွယ်၍ YDF-Htilin မှ ထီးလင်းမြို့နယ်အတွင်းတွင် လုံခြုံရေးဂိတ် (၄) ဂိတ် ဖွင့်လှစ်ဆောင်ရွက်နေပြီဖြစ်ပါသည်”လို့ အသိပေးထားပါတယ်။ ဒါကြောင့် ပြည်သူများအနေဖြင့် လုံခြုံရေးအရ စစ်ဆေး၊ မေးမြန်းပါက ကြည်ဖြူစွာ ပူးပေါင်းဆောင်ရွက်ပေးကြဖို့၊ တားမြစ်ပစ္စည်းတွေ သယ်ယူရောင်းဝယ်ခြင်းများ မပြုလုပ်ကြဖို့နဲ့ ဂိတ်ရှိတပ်ဖွဲ့ဝင်တွေကို ငွေကြေးပေးဆောင်ခြင်း မပြုလုပ်ကြဖို့၊ အခွန်/အလှူငွေ ကိစ္စများကို YDF-Htilin ရုံးသို့သာ ချိတ်ဆက်ဆောင်ရွက်ပေးကြဖို့ တိုက်တွန်းထားပါတယ်။
တပ်ဖွဲ့ဝင်တွေက စစ်ဆေးမေးမြန်းရာမှာလည်း ရိုင်းစိုင်းတာ၊ ခြိမ်းခြောက်တာ၊ ငွေကြေးတောင်းခံမှုတွေရှိခဲ့ရင် သက်ဆိုင်ရာအကြီးအကဲများနဲ့ YDF-Htilin ရုံးသို့ အသိပေးတိုင်ကြားပေးကြဖို့ မိဘပြည်သူများထံ တောင်းဆိုထားပါတယ်။
