နိုဝင်ဘာ ၂၅၊ The Nation Voice
စစ်ကိုင်းတိုင်း၊ရွှေဘိုကနေ ကျောက်မြောင်းဘက်ကို တက်လာတဲ့ အကြမ်းဖက်စစ်တပ်ယာဉ်တန်းကို နိုဝင်ဘာ(၂၃)ရက်နေ့က ပူးပေါင်းအဖွဲ့နဲ့အတူ မိုင်းဆွဲတိုက်ခိုက်ခဲ့ကြောင်း နေလစင်္ကြာ_Shwebo PDF က သတင်းထုတ်ပြန်ပါတယ်။
နိုဝင်ဘာ(၂၃) မနက်(၁၀)နာရီကျော်က ရွှေဘိုကနေ ကျောက်မြောင်းဘက်ကိုတက်လာတဲ့ ကားကြီး(၃)စီးပါ အကြမ်းဖက်စစ်တပ်ယာဉ်တန်းကို သတင်းကြိုရရှိတာကြောင့် ပဒေသာမိုင်း(၅)လုံးနဲ့ ကြိုတင်စောင့်ဆိုင်းပြီး ဖောက်ခွဲတိုက်ခိုက်ခဲ့တာလို့ ဆိုပါတယ်။
အဲ့ဒီတိုက်ခိုက်မှုကြောင့် အကြမ်းဖက်စစ်တပ်ယာဉ်တန်းက ကား(၃)စီးလုံး မိုင်းထိမှန်ခဲ့ပြီး ထိခိုက်သေဆုံးမှုအခြေအနေကိုတော့ ဆက်လက်စုံစမ်းနေဆဲဖြစ်တယ်လို့ ဖော်ပြထားပါတယ်။
အလားတူ နိုဝင်ဘာ(၂၄)ရက်နေ့မှာလည်း ခင်ဦးလမ်းဆုံကနေ သေနတ်တွေပစ်ဖောက်ပြီး ကိုးပင် စစ်တပ်လေ့ကျင့်ရေး(အမှတ်-၈)ထဲကိုပြန်လာတဲ့ အကြမ်းဖက်စစ်တပ် ကား(၁)စီးကို ဒေသခံတပ်တွေက အဝေးထိန်းရှေ့ထွက်မိုင်းအကြီးစား(၅)လုံးနဲ့ စောင့်ကြို ဖောက်ခွဲတိုက်ခိုက်ခဲ့ပါသေးတယ်။
အဲ့ဒီဖောက်ခွဲတိုက်ခိုက်မှုကြောင့် ကားမှာ မှန်ကွဲပြီးကားမီးလုံးနဲ့ ဘော်ဒီအစိတ်အပိုင်းတွေ ပဲ့ကျန်ခဲ့ကာအကြမ်းဖက်စစ်သားတွေရဲ့ အသေအပျောက်စာရင်းကိုတော့ အတိအကျမသိရသေးဘူးလို့ Shwe Bo Defense Force (SBDF)က အသိပေးထားပါတယ်။
မန္တလေး၊ ရွှေဘို၊ မြစ်ကြီးနားကားလမ်းမကြီးပေါ်မှာ ဒေသခံတပ်တွေစစ်ရေးလှုပ်ရှားမှုတွေရှိနေပြီး ပြည်သူတွေအနေနဲ့ ည(၇)နာရီကနေ မနက်(၅)နာရီအတွင်းဖြတ်သန်းသွားခြင်းမပြုကြဖို့နဲ့ အကြမ်းဖက်စစ်အုပ်စုနဲ့ ဝေးရာမှာနေကြဖို့ကို ဒေသခံတပ်တွေကအထူးမေတ္တာရပ်ခံထားပါတယ်။
