ဇန်နဝါရီ ၂၊ The Nation Voice
တနင်္သာရီတိုင်း၊ထားဝယ်-ထီးခီးလမ်းမကြီးပေါ်မှာ ဒီဇင်ဘာ(၃၀)ရက်နေ့က ဒေသခံပူးပေါင်းတပ်တွေဟာ ကားတွေကိုတားဆီးစစ်ဆေးခဲ့ရာ စစ်တပ်ထုတ်ကုန်နဲ့ မူးယစ်ဆေးဝါးတွေကို ဖမ်းဆီးရမိခဲ့တယ်လို့ တောင်ပိုင်းစစ်ဒေသ သတင်းနှင့်ပြန်ကြားရေးက သတင်းထုတ်ပြန်ပါတယ်။
ပြည်သူ့ကာကွယ်ရေးတပ်မတော် ထားဝယ်ခရိုင် တပ်ရင်း(၁)၊ Kawthoolei Army နဲ့ သံမဏိပျောက်ကျားတပ်ဖွဲ့ နဘယံတို့ကပူးပေါင်းစစ်ဆေးခဲ့တာလို့သိရပါတယ်။
ဒီဇင်ဘာ(၃၀)ရက်နေ့ မနက်ပိုင်းကစပြီး ထားဝယ်ဘက်ကနေ ထီးခီးဘက်ကိုတက်လာတဲ့ ကားတွေကိုတားဆီးစစ်ဆေးခဲ့ရာ မနက်ပိုင်းနဲ့ ညနေပိုင်းမှာ ဒဂုံဘီယာနဲ့ Andaman ဘီယာတွေဖမ်းဆီးရမိခဲ့ပြီး ညနေ(၅)နာရီလောက်မှာ မူးယစ်ဆေးဝါးတွေကိုပါ ဖမ်းဆီးရမိခဲ့တာလို့ သိရပါတယ်။
ဖမ်းဆီးရမိတဲ့ ဘီယာတွေကို ကားနဲ့တက်ကြိတ်ဖျက်ဆီးခဲ့ပြီး မူးယစ်ဆေးဝါးတွေကိုတော့ မီးရှို့ဖျက်ဆီးခဲ့တယ်လို့ ဆိုပါတယ်။
“အဓိကတော့ ဘီယာတွေပါ ဖမ်းဆီးတယ်ဆိုတာ စစ်ကောင်စီအကျိုးစီးပွါးကို တိုက်ရိုက်ပတ်သက်တာကြောင့် ၊ ဒီအမျိုးစားတွေ ကုန်သွယ်လို့မရကြောင်း ကျနော်တို့ အသိပေးထားပြီးသားပါ။ မူးယစ်ဆေးဝါးကတော့ လုံးဝလက်မခံသင့်တာ ဆရာတို့လည်း အသိပါပဲ”လို့ ဖမ်းဆီးရာမှာပါဝင်တဲ့ တာဝန်ရှိသူ တစ်ဦးရဲ့ပြောစကားကို တောင်ပိုင်းစစ်ဒေသ သတင်းနှင့်ပြန်ကြားရေးက ဖော်ပြထားပါတယ်။
တနင်္သာရီတိုင်းအတွင်းမှာ စကစတပ်နဲ့ ဒေသခံပူးပေါင်းတပ်တွေ စစ်ရေးအခြေအနေတင်းမာလျှက်ရှိပြီး ပြည်သူတွေအနေနဲ့လည်း ဒေသခံတပ်တွေရဲ့ လုပ်ငန်းစဉ်တွေ မှာပူးပေါင်းပါဝင်ပေးကြဖို့ကိုတိုက်တွန်းထားပါတယ်။
